Manispaa ya Songea yafikia asilimia 98 utengenezaji madawati

Hadi Juni 22  utengenezaji madawati utakuwa asilimia 100

Halmashauri ya manispaa ya Songea mkoani Ruvuma imefikia asilimia 98 katika utengenezaji wa madawati hadi kufikia Juni 20 mwaka huu.

Ofisa habari wa manispaa hiyo Albano Midelo amesema manispaa hiyo katika kutekeleza agizo  la Rais John Magufuli la kumaliza kero ya madawati inaendelea kutengeneza na kukamilisha madawati 5,130 yenye thamani ya  zaidi ya shilingi milioni 333.45 ambayo yanahitajika katika manispaa ya Songea.

Hata hivyo amesema hadi kufikia mwezi Juni  Madawati yote yaliyokwisha tengenezwa ni zaidi ya 5000 kati ya madawati 5130 ambayo sawa na zaidi ya asilimia 98 ya mahitaji  ya

madawati yote katika manispaa hiyo.

Kaimu afisa elimu wa manispaa ya Songea Sunday Wahyungi amesema Mradi wa madawati katika manispaa hiyo ulianza tangu mwezi wa Desemba mwaka 2015  ikiwa ni utekelezaji wa agizo la Rais wa Jamhuri wa Muungano wa Tanzania iliyowataka  Wakuu wa Mkoa,Wakuu wa Wilaya na Wakurugenzi kuhakikisha kuwa hakuna wanafunzi wanaokaa chini hadi kufikia Juni 30 mwaka huu.

Wahyungi amesisitiza kuwa kabla ya Juni 30 hakuna mwanafunzi ambaye atakaa chini katika shule za msingi za manispaa hiyo kwa kuwa madawati yote yaliopangwa kukamilisha mradi wa madawati yatakuwa yametengezwa hivyo uhaba wa madawati katika manispaa ya Songea kubakia kuwa historia.

Kwa upande wake mkuu wa wilaya ya Songea Benson Mpesya amesisitiza kuwa hadi kufikia Juni 25 mwaka huu miradi yote ya madawati katika wilaya hiyo itakuwa imekamilika hivyo kumaliza kabisa tatizo la baadhi ya wanafunzi katika shule kukaa chini kutokana na upungufu wa madawati.

Mpesya ambaye pia ni kaimu mkuu wa mkoa wa Ruvuma amesema wilaya ya Songea imefikia hatua nzuri ya utengenezaji wa madawati ambapo hati kufikia Juni 22 miradi yote ya madawati itakuwa imekamilika katika manispaa ya Songea.

Amezitaja wilaya nyingine za mkoa wa Ruvuma ambazo utengenezaji wa madawati umefikia zaidi ya asilimia 80 kuwa  pamoja na Namtumbo,Mbinga,Nyasa na Tunduru na kwamba taarifa alizonazo ni kwamba hadi kufikia Juni 28 miradi ya madawati katika wilaya zote itakuwa imekamilika.

Amewaagiza watendaji katika ngazi zote katika mkoa wa Ruvuma kusimamia zoezi la utengenezaji wa madawati yaliobakia  kabla ya Juni 30  ili kuhakikisha kuwa kuanzia mwezi Julai mwaka huu tatizo la madawati katika shule za mkoa wa Ruvuma ibakie kuwa historia.

Mwisho