Manispaa ya Songea yapata Hati Safi

Ni katika miradi yote ya maji,afya na kilimo

Na Julius Konala

Taarifa ya mdhibiti na mkaguzi mkuu wa Hesabu za serikali(CAG)  imetoa Hati Safi katika miradi yote mitatu ya Halmashauri ya manispaa ya Songea mkoani Ruvuma.

Jenifer Omolo mkurugenzi wa manispaa ya Songea

Ofisa habari wa manispaa ya Songea Albano Midelo ameitaja miradi iliyopata Hati Safi katika manispaa hiyo kuwa ni pamoja na  mradi wa maji(NWSDP),mradi wa  afya Health Basket Fund(HBF) na mradi wa kilimo na mifugo Agriculture Sector Development project(ASDP).

Kwa mujibu wa Midelo Juni 8 mwaka huu Halmashauri ya manispaa ya Songea

ilipokea taarifa za miradi hiyo mitatu kutoka kwa mdhibiti na mkaguzi mkuu wa Hesabu za Serikali katika kipindi cha mwaka 2014/2015 ikionesha miradi yote mitatu imepata Hati Safi.

Hata hivyo amesema hivi sasa menejimenti ya manispaa hiyo inaendelea na mchakato wa kujibu hoja ambazo zimetolewa kwenye miradi hiyo kisha kupelekwa kwa CAG kwa ajili ya kuhakikiwa,kufungwa na kufutwa kwa hoja zinazohusika ndani ya siku 21 kuanzia Juni 8 mwaka huu.

Wakati huo huo Halmashauri ya manispaa ya Songea imependekeza kufuta wadaiwa saba sugu wanaodaiwa   zaidi ya shilingi milioni 14.7 katika kipindi cha kuanzia mwaka 2011/2012 ambapo Halmashauri ya manispaa hiyo ilipata Hoja za Ukaguzi ambazo zilitokana na kutokusanywa kwa fedha za mtu binafsi na vikundi vya wanawake  kutokana na kukosa kumbukumbu na orodha ya vikundi.

Ofisa habari huyo wa manispaa ya Songea anabainisha kuwa vikundi vya wanawake katika kipindi cha mwaka 1997 hadi 2012  walikuwa wanadaiwa zaidi ya shilingi milioni 10 na kwamba Hoja ya kudaiwa vikundi hivyo hadi leo bado haijafungwa kutokana na wadaiwa kutoilipa manispaa.

 “Ufuatiliaji uliofanyika unaonesha kuwa wadaiwa wote hawajulikani walipo kwa kuwa vikundi,orodha yao haipo na aliyekuwa mratibu wa kazi ya vikundi hivyo amefariki Dunia, kwa kuwa Hoja hiyo imeendelea kuwepo hadi sasa  mweka hazina mkuu wa manispaa ya Songea amependekeza kufutwa kwa wadaiwa hawa’’,alisema.

Alisema mwaka 2011/2012 Halmashauri ya manispaa ya Songea ilipata Hoja za ukaguzi namba 2.2.10.2 ambayo ilitokana na kutokusanywa kwa fedha za pango za kituo cha mabasi kwa wapangaji  sita  ambao wanadaiwa jumla ya shilingi milioni 4.6 kwa mwaka wa fedha wa 2007/2008 unaoishia Juni 30 mwaka huu na kwamba hoja haijafungwa hadi sasa ambapo wadaiwa hawajulikani na wamefunga vibanda vyao.

Amewataja wadaiwa sugu hao kuwa ni Nassoro Suleiman anadaiwa kuanzia Juni 2009 hadi Mei 2016 jumla ya shilingi 400,000,Kilimanjaro Express kuanzia Januari 2007 hadi Mei 2016 jumla ya shilingi milioni 1.65,Martin Massawe kuanzia Januari 2007 hadi Mei 2016 jumla ya shilingi 600,000,Mr.Nyaruke kuanzia Januari 2007 hadi Mei 2016 shilingi milioni 1.8 na Esta Komba kuanzia Januari 2007 hadi Mei 2016 shilingi 150,000.

Kwa mujibu wa kifungu cha local Authorities Financial Memorandum cha mwaka 2009,LAFM Order 44(3) kinaeleza kufuta wadaiwa sugu na kifungu 104(2) cha local authorities Financial Memorandum cha mwaka 2009 kimeweka umri wa zaidi ya miaka mitano kama kigezo cha madai yasipolipwa kufutwa.

Mwisho.