Manispaa ya Songea kuwa kituo kikuu cha utalii kusini

Barabara ya lami Mtwara hadi Mbinga itakamilika mwezi Oktoba mwaka huu

MIAKA mitano ijayo manispaa  ya Songea mkoani Ruvuma inatarajiwa kuwa kituo kikubwa cha utalii katika ukanda wa kusini.

Leonidas Gama mbunge wa Songea mjini

Ofisa habari wa manispaa hiyo Albano Midelo alisema mbunge wa Songea mjini Leonidas Gama akizungumza na wakuu wa idara na vitengo wa manispaa ya Songea kwenye ukumbi wa manispaa hiyo alisema hadi kufikia mwezi Oktoba mwaka huu barabara ya kutoka Mtwara hadi Mbinga inatarajiwa kuwa lami.

Gama amesema mara baada ya barabara hiyo kukamilika fursa za uwekezaji hasa katika sekta ya utalii zilizopo manispaa ya Songea zitavutia wawekezaji wengi wa ndani na nje ya nchi na kufika kuwekeza hali ambayo itaongeza mapato na ajira kwa wakazi wa manispaa hiyo.

“Mtwara  kuna wawekezaji ambao wapo kutokana  na kugundulika gesi,wawekezaji hawapendi joto hivyo watapenda kutembelea maeneo yenye hali nzuri ya hewa kama Songea ili kutalii,hivyo fursa za utalii zilizopo manispaa ya Songea zitaongeza uwekezaji’’, alisema Gama.

Gama amesema mazingira ya Songea kutokana na hali ya hewa na vivutio adimu vya utalii itakuwa ni kituo kikuu cha utalii hivyo kufungua milango ya utalii kusini kuanzia Mtwara hadi  mwambao mwa ziwa Nyasa.

Kutokana na hali hiyo amewataka watalaam wa manispaa ya Songea kuanza kuboresha vivutio ambavyo vitawavutia wawekezaji hasa ujenzi wa hoteli bora,nyumba za kulala wageni,miundombinu bora ya umeme,kuboresha kiwanja wa ndege cha Songea pamoja na kuvitangaza vivutio vyote vya utalii vilivyopo.

“Ingieni kwenye mtandao,tafuteni fursa za uwekezaji zipo.Kwa mfano  wajerumani ni wawekezaji wazuri ambao wanaangalia fursa na kukutafutia wawekezaji moja kwa moja,hivyo Songea tuwatumia hao ili kuendeleza sekta ya utalii ambayo inachangia pato la Taifa’’,alisisitiza.

Mchumi wa manispaa ya Songea Raphael Kimary anavitaja vivutio adimu vya utalii vilivyopo katika manispaa hiyo kuwa ni  makumbusho ya Taifa ya Majimaji,hifadhi ya asili ya  Luhira na vivutio vingine vya kishujaa na kiutamaduni.

“Manispaa ya Songea ni chanzo cha  bonde la Mto Ruvuma ambao unatiririsha maji katika baharí ya Hindi na Mto Ruhila ambao hutiririsha maji katika ziwa Nyasa.Mtiririko wa maji ya mito hutegemea majira ya mwaka, huwa mengi wakati wa mvua’’,alisema Kimary.

Hata hivyo amesema Sehemu kubwa ya Manispaa ya Songea  ina umbile la tambarare, mwinuko wa Milima Matogoro na Unangwa na kwamba Manispaa ipo katika mwinuko wa nchi kutoka usawa wa baharí kati ya mita 980 na 1500.

Halmashauri ya Manispaa ya Songea ni miongoni mwa Halmashauri tatu zilizopo katika wilaya ya Songea ikiwa na kata 21 na mitaa 95.Halmashauri nyingine zinazounda wilaya hiyo ni Halmashauri ya wilaya ya Songea na Madaba.

Mwisho